Genesis 24

Aisik Hawe Rebeka

1Abraham badeh ndra alon labai, ma jaha tan ndra sola, eme Laban badeh atehei nyosowan i la-un ta mada san mari. 2Eme iy tiye i ta lau ta lahou tan ta atondrok badu asiu tan, ma iy ta atondrok lakou mari tan, “Ou tawi baha bak ta kalem, 3Jo badeh aseken ou tandrakan na nyara Laban, iy Kindrei badu kandrah ma munyak, ta ou sakohok badih sala ta naduk badu kenan, kon jo manyah udu hawe iri dah, 4arile ou kameh ala kon tek ala hawe lowak oro amwenen akohok ari badih ki ta naduk Aisik.”

5Eme iy lau ta lahou tan tiye, “Ya ki buku none iy badih ki bwalen ta eme kameh ki buku sah bah?”

6Abraham anya eh, “Ou badeh sandrei naduk sawek badeh. 7Laban Kindrei badu kandrah le badeh kuhi jo eme len ta boho kamen ta tama udu munyak tek, iy tiye ma tandrakan jo ta edeu munyak dah i ta lundriyek oro. Iy kameh suni angelo ili bwena tam, ta aseben ou kandrei ari badih badu badeh keme ta naduk. 8I buku none i badih bwalen ta eme hawem eme, badeh batanau tek balem kamani ai. Arile ou sandrei naduk sawek badeh.” 9Ano badeh i lau ta lahou tan dah tawi baha ba Abraham dah ma tandrakan bohon i tan ta nyala lakou nane dah.

10Ano badeh i lau ta lahou tan dah andrei katin haka ronoh kamel ma hawe lakou rayah mwasin ta Abraham badeh, ma iy iu ili Aram Nahara-em ma edek iu ili kon Nahor mene udu aliy. 11Eme iy bwidi iri kamel manyah ado andri ka-u gwa li udu manan ta kon; i doh na beyeh ai, mada an tiri badih ta ame a-us gwa.

12Ano badeh iy amwekes salom, “O Laban, Kindrei ta Abraham len dah ou atehei keme tek, ma ou leheya tikisiy tam ki ta Abraham. 13Ou anyolom jo badeh ales udu ka-u gwa dah ya nadu iri lau badih badu kon kameh ame ta a-us gwa. 14Kasahan i buku none jo katiye ki ta i badih, ‘Ei, bwisi gwa tam ki andri ya jo anya ka-un se gwa,’ Ya i buku none iy anya, ‘Abo ou a-un; ma jo kedeu gwa ki ta kamel tam.’ Eme badih doh baden adeh, ki ta nadu i lau tam Aisik. Eme ya jo kameh i tanan ou badeh leheya mwasin tam i ta Abraham.”

15Iy ano salom le badeh, Rebeka edek ma sabok tan udu kasen eme. Iy badeh nadu Betu-el ya Betu-el i ndrine Milkah, udu nadu tine Abraham Nahor. 16Iy badeh konen labai, ma iy ma bihin le; ari lau bakohok iy bwe le. Iy edek ili gwa li, asuni sabok tan ano iy eme hamon ja badeh, 17iy lau ta lahou dah edek ili suwi badeh tiye, “Ei, jo anya ka-un se gwa badu bolo sabok tam badeh?”

18Eme iy anya, “Laban tek, Ou a-un.” Eme Rebeka suri sabok tan atehei i minen ma iy a-un.

19Iy atehei gwa ili iy a-un, ano badeh iy tiye, “Jo kili ka-us rayah gwa ale ki wa-i oro kamel tam winiya oro le barakoh ta a-un.” 20Eme badeh iy solowei gwa i bolo bwisi gwa toro kamel, ano badeh iy ibotatahan ili mada gwa li asuni gwa ja eme, winiya le oro kamel akoh na gwa. 21Eme i lau ta lahou dah anyolom iy le, iy bawadei bwe, iy anyolom ma iy lomondra, “Laban kameh baratehei jo barasekesek de bwe.”

22Ano oro kamel a-un gwa ano badeh, lau ta lahou dah lihidi bek nyikilikin ta ndrundrun ta no-o ndramak eme len, maha i le winiyan maha, la-uh ja ta bohan badeh maha sese ta bohan. 23Ano iy anya, “Ou nadu are handru? Ou tiye tek asiu ta tamam badeh winiyan aso amadin aliy na ben dah de bwe?”

24Eme iy tiye, “Jo badeh nadu Betu-el, Betu-el i ndrine Milkah uru Nahor.” 25Ano iy asehek le ili, “Bwidiu solo-an asoker ma asiu tado ta amadin na ben dah winiyan.”

26Eme iy aluh kandrun i andri ma iy atudun Laban, 27tiye, “Katudun Laban, Laban ma Kindrei ta Abraham, iy badeh amwekes sahou tandrakan hawe Abraham ta iy bamani iy bwe. Eme Laban le badeh tiyani jo edek ili isos asiu ta lowan oro.”

28Eme badih dah sakaliye ili asiu ta tinen ma asehek nyalan ta sahou mari. 29Ya Rebeka badeh nadu tinen mwan ari nyaran Leban, eme iy edek suwi, suwi ili hawe iri lau ado mada gwa. 30Iy anyolom bek nyikilikin ta no-o ndramak ano, ma anyolom bokomwak udu boha nadu tinen ma Rebeka asehek nyalan, ano badeh iy edek ili badeh anyolom i lau dah ales udu mirihik ta kamel mirihik ta gwa udu aliy kahis le, 31“Ou badeh Laban atehei nyosowan udu tam. Ou ales are dah abosah? Jo badeh ndralowosani bolo asiu ma ndralowosani ndrahune oro kamel.”

32Eme oro ala asiu, iy ili boho asiu, ano oro bwese-ei lakou udu la-u kamel eme andri. Eme atehei bwidiu asoker i noro kamel ma gwa i wa-in ma i wa-i lau tan ma i toro ta sikine kati oro. 33Ano badeh bwese-ei nyamon eme batalan, eme iy anya eh, “Jo katiye sahou tek op, ano jo baraimon.”

Eme Leban anya eh, “Abo ou asehek taso.”

34Eme iy anya, “Jo dah jo lau ta lahou ta Abraham. 35Laban badeh ndratehei nyosowan ndra ta Abraham mwasin labai, ma iy badeh tan lakou solo-an labai. Kindrei badeh atehei tan sipsip, bulumakau, silba ma hawe gol ma atehei tan iri lau ta lahou tan mwan ma badih ma hawe iri kamel hawe donki. 36Udu Abraham Sara badeh ndra alon handru eme iy atehei tan nah mwan ari, ma atehei tan lakou mari iy aseken. 37Eme Abraham badeh tiye sahou boto-on ma tandrakan ma tiye, jo badeh sakohok ari badih nadu iri Kenan sala ta nadun badu munyak iy manyah udu aliy doh, 38arile iy tiye tek badeh keme hawe lowa taman oro keme boho kamen tan amwenen kakohok ari badih ki ta nadun.

39“Ano jo ndremenya Abraham, ‘Ya i buku none i badih bwalen ta eme hawek kameh i buku sah bah?’

40“Eme iy tiye, ‘Laban, ala jo edek hawen dan badeh kameh barasuni angelo tan barawek hawem ma i dah kameh tedek tam udu mwasin, ma ou kameh winiyan andrei ari badih eme ta naduk badu boho kamen tek amwenen badu hawe lowa tama. 41Na len ou ala boho kamen tek, ya i buku none oro batehei iy bame bwe, badeh na tandrakan tek le ou ame hamon.’

42“Eme jo eme na len dah, eme mada gwa, jo tiye, ‘O Laban, Kindrei ta Abraham, i buku none seken tam handru, ou atehei len ta tekedek tek jo eme ta aliy dah badeh keme minek. 43I buku none ari badih keme dah ta a-us gwa, ya jo katiye ki tan, “Ei, jo anya ka-un se gwa badu bolo sabok tam badeh,” 44ya i buku none iy katiye anya, “Ou a-un ma jo ka-us rayah gwa ki wa-i kamel tam oro ale,” Iy don baden adeh, kameh ou anya ki ta nadu Abraham!’

45“Salom tek udu ndra ndrinek le badeh, Rebeka asahan ma bwisi sabok tan udu kasen eme. Eme iy ili a-us gwa, ano jo tiye i tan, ‘Ei, jo anya ka-un se gwa tam.’

46“Eme suwi labai badeh iy suri sabok udu kasen eme andri ma iy tiye, ‘Ou a-un,’ ma ‘Jo ka-us rayah gwa ki wa-i kamel tam oro ale.’ Eme badeh jo a-un gwa, ya iy edeu gwa i toro kamel.

47“Eme badeh jo ndrmenya iy, ‘Ou nadu areh?’

“Iy anya eh, ‘Jo badeh nadu Betu-el i ndrine Nahor, ala Milkah atehei nadun.’ Ano badeh jo atehei bek nyikilikin i no-on ma hawe atehei bokomwak i bohan, 48Ano jo aluh i andri ma atudun Laban. Jo asore Laban, Kindrei ta Abraham, ta iy badeh tiyani jo eme amwenen ta nadu tubu, nadu tine Abraham ta iy udu nadum. 49Eme ya, i buku none ou tikisiy Abraham eh, badeh ou asumon; ya i buku none bwe eh, badeh ou asehek tek. Eme ya jo kasilah madan san ari ja.”

50Eme Leban hawe Betu-el uru tiye, “Tanan dah badeh badu ta Laban labai; aru badeh winiyan basehek sasah ta aliy bwe. 51Rebeka badeh kada-ah; ou andrei iy kewek ki ta nadu Abraham i buku le Kindrei ndratiye.”

52Eme lau ta lahou ta Abraham anuhun uru tiye, ano le badeh iy aluh i andri bada munyak ta mada Laban Kindrei. 53Ano badeh lau ta lahou dah badeh lihidiy gol hawe silba nyikilikin hawe ra-ei kolau ma atehei i ta Rebeka; ano iy ale edeu lakou rayah sowan tinan handru i ta nadu tine Rebeka hawe tinen. 54Ano badeh iy ma hawe lau nane badu hawen badeh aimon nyamon ma a-un gwa, ano badeh oro amadin. Ano iy amak mandraben handru iy anya, “Ou satawi jo, jo ki-iu ki hamon ja hawe Abraham.”

55Arile nadu tine Rebeka hawe tinen tiye anya, “Rebeka winiyan bawek bwe, iy kudu winiya len ma ronoh kano badeh, iy barawek.”

56Eme iy tiye i turu, “Ah badeh satawi aru sado. Laban badeh ndramwesekei san tek ndramwe-es; ou atehei jo ki-iu ki hawe Abraham.”

57Ano uru anya, “To kaluhi iy keme ya to kandremenya seken tan.” 58Eme oro luhi Rebeka eme, ano oro lelen iy, “Ou aseken ala hawe ndreh kede-eh de bwe?” Eme badeh iy anya eh, “Ehe, jo aseken ta ili.”

59Eme badeh oro tiye iy, ma hawe oro badih ta tondrok iy ala hawe iy lau ta lahou ta Abraham ma lau tan. 60Ano oro batanau ma tiye tan, “Nadu tine aso, lundriyem kasahan sola wa-iralou ano wa-iralou, ma lundriyem oro kadai lau ta amwekes lomondra ndra-in i toro!”

61Ano badeh Rebeka hawe badih tan badeh alokou oro ano badeh sawei kamel i hamon hawe oro lau. Eme oro lau ta lahou andrei Rebeka ma oro au.

62Aisik badeh udu Negeb ndrame ndra-en Ber Lahai Roi. 63Iy edek leleyah ili lobwidiu na beyeh eme madan anya kili badeh iy anyolom iri kamel adek ame mirihik. 64Rebeka anyolom eme loken iy atou Aisik. Eme iy udu bwele-e kamel eme andri, 65ma ndremenya oro lau ta lahou ta Abraham, “Are lau edek udu lobwidiu len eme, nyaha le to dah?”

Eme iy lau ta lahou dah anya eh, “I doh Aisik.” Eme badeh Rebeka kuhi kolau su-i badan ma batun.

66Ano lau ta lahou ta Abraham badeh asehek nyala Aisik ta lakou mari iy amwekes, 67Eme Aisik kuhi iy ili bolo asiu balei ta tinen Sara, ma iy andrei Rebeka i udun. Rebeka asahan udun ma iy aseken iy labai; ki buku none tinen imek badeh iy babudon bwe ai, badih ta seben iy udu aliy.